.png)
時代一直teh改變，生活習慣mä kah早前無仝，所使用的各種器具mä有真大的差別，加上教育普及、生活水準提高、醫療衛生改進、科技發展，chit幾十年來，台灣社會已經愈來愈高齡化、都市化、工業化，農村人口一日一日減少koh老年化，致使少年人愈來愈少有機會及老大人講話，早前一代傳一代、一喙傳一耳的一寡俗語話，mä愈來愈少人講ah。有時老大人無意中làu兩句仔俗語話，少年人那「鴨仔聽雷」、m̄知in teh講啥。有時有的少年人聽了感覺趣味趣味有想beh學，緊夯筆起來記。總是，無管按怎，事實上台灣俗語話是愈來愈少人會曉講，mä愈來愈少人聽有。
李南衡
1940年 佇台灣桃園出世
1964年 私立東海大學社會系畢業
曾佇廣告公司擔任創意主任、兒童雜誌主編、信誼基金出版社社長、勝一化工公司秘書，已經退休。
主編「日據下台灣新文學」五冊、著作十數本、翻譯六本。曾佇《民生報》、《中國時報》、《聯合報》、《自立晚報》、《自由時報》、《台灣日報》各報紙，《皇冠》、《統領》各雜誌寫專欄。
佇報紙用台文寫時事評論專欄第一人。
2005年 考入國立台灣師範大學台灣文化及語言文學研究所語言組。
2008年 得國立台灣師範大學碩士學位。
目前擔任台北「綠色和平廣播電台」節目主持人，佇《台灣教會公報》、《新使者》寫專欄。
i 序言─話講佇頭前
1 頭洗落ah，無剃bē使！
4 戲棚腳徛久的人的
7 是m̄是，罵家己
10 人teh做，天teh看
13 豬m̄肥，肥佇狗！
16 三年一閏，好歹照輪！
19 雞kui若歕破，台灣就免住！
22 一兼二顧，摸蜊仔兼洗褲
25 你chit-ê囝仔kah人無仝款！
28 M̄-bat食過豬肉，mā bat看過豬行路！
31 管伊北京落雪！
34 人若衰，種匏仔生菜瓜！
38 敢作牛，m̄驚無犁好拖！
42 亦著箠，亦著糜
45 放屎無拭尻川！
48 坐轎才beh縛腳
52 狗吠火車
56 作官清廉，食飯攪鹽！
60 無日m̄知晝，無鬚m̄知老
63 天無khiάt 仔都beh peh起去！
67 戲搬到老ah，嘴鬚thèh佇手！
70 台灣錢淹腳目
74 豬公無相請，嫁查某子貺大餅
77 叫豬叫狗，不如家己走！
80 無冤無家，不成夫妻
84 六月半年某，七月鬼仔某
88 第一戇，選舉運動！
92 拍狗mā tiόh看主人
95 有肉thang食嫌無菜
99 上卌就bē 攝
102 家己的家己好，別人的生蝨母！
105 死貓吊樹頭，死狗放水流
108 某死ah，看kah hit腳尿桶！
111 你mài看人貓的無點！
114 船破，海坐底
序言
話講佇頭前
李南衡
咱知，俗語話是民間普遍流行、大眾化、通俗化的一種定型的語句。
因為是一種定型的語句koh定定聽tiõh，聽久˜但瞭解伊的意思，mä煞會曉使用。俗語話是一般社會大眾所創造出來的話語、喙接喙耳傳耳傳落來的。因為chiah-ê攏是ùi生活中、經驗中提煉出來的，字句簡單好bat、有的koh有押韻，加真好記。連無受過教育的人mä聽有、mä會曉tòe人講。Che內底有大量運用比喻、謗影、對比的手法，聽tiõh誠趣味。
一般講的台灣俗語話，包括諺語（農諺、漁諺、天候諺）、歇後語（激骨話）、成語等等。Chiah-ê攏是由社會大眾所創作累積起來的，相當會反映tiõh人民的生活經驗kah願望、生活哲理kah態度，當然mä有包含一寡做人做事的道理。無論teh講話中、抑是演講的時，甚至寫文章（書面語頂面）插一兩句台灣俗語話，攏會互平平台灣人感覺khah趣味、khah親切、mä khah會有認同感。
時代一直teh改變，生活習慣mä kah早前無仝，所使用的各種器具mä有真大的差別，加上教育普及、生活水準提高、醫療衛生改進、科技發展，chit幾十年來，台灣社會已經愈來愈高齡化、都市化、工業化，農村人口一日一日減少koh老年化，致使少年人愈來愈少有機會及老大人講話，早前一代傳一代、一喙傳一耳的一寡俗語話，mä愈來愈少人講ah。有時老大人無意中làu兩句仔俗語話，少年人那「鴨仔聽雷」、˜知in teh講啥。有時有的少年人聽了感覺趣味趣味有想beh學，緊夯筆起來記。總是，無管按怎，事實上台灣俗語話是愈來愈少人會曉講，mä愈來愈少人聽有。Chit內底有可能是因為有摻tiõh一寡已經過時、無合時代的詞彙，致使有一寡台灣的俗語話煞褪色去ah！h³少年人聽kah霧sà-sà。
年久月深，語言加減攏會發生變化，因為流傳的地域關係，mä會有小可精差。我寫的台灣俗語話kah你所知的若˜是逐字攏相仝，m̄免感覺奇怪。每一句那teh褪色的台灣俗語話，我會先寫伊原本的意思，才寫出hit句話延伸的意思，路尾才寫hit句俗語話那會漸漸teh褪色。我寫chit本冊的用意，第一是beh提醒老一輩的阿公阿嬤阿伯阿姆，咱定定teh講而且講kah真續喙的一寡俗語話，少年輩的台灣囝仔真濟攏聽無ah。同時mä是beh h³少年輩的台灣人知影，早前台灣有親像chit款chiah趣味koh真寶貴的俗語話，雖然chiah-ê俗語話那teh褪色；不過，加減知、加減學，罔參考mä bë bái。
(部分內容欣賞)
人teh做，天teh看
早前的台灣人講：「giâ頭三尺有神明。」甚至想講天就是神、kä神叫作天。所以才會有「人teh做，天teh看。（Lâng teh chò, thi° teh khòa°.）」chit句俗語話。意思是講做人做事tiõh khah差不多咧，m̄ thang想講無人teh看就會使濫摻（läm-sám）來。Chit句俗語話，對小貪、投機、看四箍圍仔攏無人，想beh做歹代誌、m̄-koh心肝底加減猶有尊重神明的人，確實有遏止作用。
現代的台灣人那像是「m̄驚神、m̄驚鬼」，無宗教信仰的人愈來愈濟，m̄-nä無驚半人，in心目中mä無神明，啥物歹代誌都敢做。講in「啥物攏m̄驚」mä無影，in做歹的時猶koh有驚一項：監視器。
講tiõh監視器，咱bë使無佩服二十世紀電影界的奇才，會使講是電影史上第一偉大的演員、導演kah製作人Charlie Chaplin，伊佇《摩登時代》（The Modern Times）hit部諷刺資本家按怎剝削凌遲勞工的電影內底，有一節描寫資本家佇工廠內底安裝一個那像目睭的攝影鏡頭，資本家爽爽快快坐佇辦公室飲咖啡，mä會tàng隨時監視工人teh做工的現況。七、八十年後的今仔日咱koh來欣賞chit部電影那像無啥，其實Chaplin hit當時猶無咱chit-má所熟似的監視器。監視器（closed-circuit television）原名叫作閉路電視，是1943年德國為tiõh beh監視V-2飛彈的發射，Walter Bruch發明、由西門子公司（Siemens AG）所製造出來的世界第一台監視器，至少是《摩登時代》hit部電影公演了六年後的代誌。按呢你tiõh知影Chaplin偌仔呢厲害。
今仔日，佇飛機場、軍事基地、銀行、大賣場、超級市場、便利商店、病院、大路邊、甚至佇街頭巷尾，攏有裝監視器。警方定定靠tiõh監視器的錄影帶才掠tiõh罪犯，甚至有真濟重大刑案靠tiõh監視器才真緊破案。當然，mä有人會煩惱「無所不在」的監視器，對個人的隱私權敢有保障？
若對現此時的台灣人講：「人teh做，人teh看。」真濟人會應講：看作你看！甚至你講「人teh做，天teh看。」真濟歹人mä無teh驚。台灣有真濟社區的公告牌仔寫講：「本社區有安裝監視器！請笑一下！」害一寡beh做歹的人笑bë出來。khah巧的歹人beh做歹代誌進前，會先kä監視器的線路破壞，伊當然無想tiõh伊的一舉一動，已經hō͘ 另外一台伊無注意tiõh的監視器翕翕去ah！
真濟台灣人已經歹kah m̄驚人teh看、mä m̄驚天teh看，干單驚監視器teh看。想想mä實在有夠悲哀！